علمني الغراب أهم درس في حياتي

من سنتين بدأت أحط أكل للعصافير على شباك من شبابيك البيت .. و كنت مبسوطة لأن أي أكل بيفيض من الولاد كنت بحطّه و ياكلوه و كمان شكل الحمام و العصافير كان جميل اوي و هو واقف على الشباك 🐦🕊😍
كنت سعيدة بفكرة أكل العصافير لغاية ما بدأ الغراب يجي ياكل معاهم .. وقتها بدأت اتضايق جداً 😤
ليه بقى ؟
الغراب كان بيجي بمنقاره يبعتر الأكل اللي في الطبق في كل حته .. و انا بحب النظام و النظافة .. فتصرف الغراب كان بالنسبة ليا مش مقبول ابدا ابدا 😱
كان عندي مشاعر غضب و استياء و رفض .
و مشاعري وصلت لأولادي و بدأوا يقترحوا عليا أفكار نتخلص بيها من الغراب 😂
لغاية ما كنت بحكي قصة استيائي من الغراب لأصحابي ، فواحدة قالت لي : الغراب أكيد جايلك لحكمة ، حاولي تشوفيها .
ودي كانت جملة فارقة في قصتى مع الغراب ..
هو ممكن يكون فعلا الغراب جايبلي رسالة عاوز يوصلها !!
طيب ليه بيدلق نص الاكل برّه الطبق !!
و قررت أبدأ رحلة التعلّم من الغراب 🤓.
بدأت كل يوم اقعد قدام الشباك الصبح بدري الاحظ الغراب و الحمام و العصافير ، يمكن اوصل لحاجة 😅
فضلت قاعدة اسابيع و شهور براقبهم ..
و بدأت أحب الغراب .. بدأت اتقبله حتى و لو مش موافقه على تصرفاته .
لاحظت :
💌 ان الغراب اول واحد في الطيور بيجي الصبح على الشباك .
💌 الغراب بياكل زيينا و لو حطيت حبوب للعصافير مش بيجي عندها ،و لو حطيت اكل مش مقبول بالنسبة لينا ناكله برده مش بيجي عنده ، و عادي جدا الحمام و العصافير بياكلوه .
💌 لاحظت ان الغراب لما بيجي و يلاقي الاكل اللي بيحبه قبل ما يبدأ ياكل ينادي على باقي اصحابه ياكله معاه .
💌 و من اجمل الحاجات اللي لاحظتها ان الحمام لما بيجي ياكل مش بيسبب مكان للعصافير الصغيرة تاكل من الطبق .. فبالتالي العصافير بتاكل من الأكل اللي الغراب طلّعه الصبح و بعتره من الطبق على الشباك .. و كأن الغراب بيجي اول واحد الصبح و يقسم الاكل عشان الكل ياكل 💗
💌 الغراب ذاكرته قوية و لما بسافر و ارجع من السفر و احط الأكل الاقيه على طول يجي و كأنه عارف ان الشباك ده دايما فيه اكل حتى و لو كذا يوم مافيش اكل .. اما الحمام و العصافير بينسوا تماما لما بسافر و ارجع بيقعدوا كذا يوم عقبال ماحد فيهم يكتشف ان في اكل و يرجعوا يزيدوا شوية بشوية .
كل الرسائل دي كانت كفيلة انها تجعلني أحب الغراب و اقبله قبول غير مشروط و مابقاش فارق معايا تصرفه اللي كان مضايقني من الاول .. وحسيت بسلام تجاه الموقف 😌.
لغاية ما حان موعد الدرس اللي اقدر دلوقتي اتعلمه من الغراب .. الدرس الحقيقي اللي ماكنتش حفهمه قبل ما اقبل الغراب ..
الدرس الحقيقي و الحكمة من وراء وجود الغراب على شباكي هي طريقة طيران الغراب .
💌لاحظت ان الحمام و العصافير لو عاوزين يطيروا بيرفعوا جناحتهم و يطيروا .. اما الغراب بيقع و بعدين يرفع جناحاته و يطير .. لدرجة ابني و هو معدّي من قدام الشباك قالي : ألحقي يا مامي الغراب بينتحر 😢 .
وقتها الرسالة وصلتني
وقتها ادركت الحكمة من وراء وجود الغراب على الشباك
التسليم لله
المواقف اللي بتضايقنا و بتوترنا بتكون بسبب أفكارنا و معتقداتنا .. لكن ربنا مش عاوز يضايقنا .. هو عاوزنا نتعلم و نرتقي و نُزكّي أنفسنا .
ادركت ان الغراب كان موجود عشان يقولي سلّمي أمورك لله زي ما برمي نفسي من الشباك و انا متأكد ان ربنا موجود و مش حيسيبني .
وقت ما ادركت الرسالة و الحكمة .. كان اخر يوم للغراب يجي عند الشباك بتاعي 😢
مهما حطيت الأكل اللي بيحبه .
الرسالة استلمتها و مهمة الغراب انتهت عند هذه النقطة .
و ايقنت وقتها ان رحلتنا في الحياة عبارة عن رحلة تزكية للنفس حتى نلقى ربنا 💗
رحلة للوصول إلى القلب السليم
رحلة للرجوع إلى السلام الداخلي.
و دي كانت رسالتي و اعتقد انها رسالة لكل واحد عنده حاجات مضايقاه في حياته ، اتأكد ان في حكمة و في شئ ايجابي سواء ادركتها او لم تدركها..!!
راقت لي

همس الحياة ,الاء فهمي معجبون بهذا