نيتي اتناوشك بالبوك

گضاني الشوگ
وتعنيت الحلم سهران
نيتي اتناوشك بالبوك

انه بنشغة حلم صاعود..
وتراوالي ضواك عثوك

نبت مردي العتب بالطيف..
يشيعني المعاتب هور..
ويخيطني الگصب سكته
وعلى طاري روازينك..
افرّع ريّتي تابوت

ولا جثة نفس طارش استورحته

سگيتك مستحه يوسف
واگول تروج.
بأول طيحتك مرطوب..
اتلگاك عثرة بير
لاگيني بحضن تنور..
الك بيه سمار شعير

وتباريني شمس غروب.
اطش روحي سفر حنّه..
ورفيف..
وهدوة ولايات.
وغنه برحي..
حسبة سنبله بيه وسچچ عوزك سوالف ناس تركض للحصاد متون

وكلها ظنون
ظني المستحاه بيبان..
يعرگ طير للدگه
ودگينه الگصص چم ريل..
مافزّن حمد ملگه
واتيهك طيف.. وشتلگه ؟
حدر كل فطر شفّه تلگاني عطش وظنون فشلة ماي
واتحدّر سراب بذمة اخر ساجيه بلا راي

وتتمشه بأمل طرواك شذرات النده بروحي سرب حفاي
بعرس الگيض اطشن واهليه فياي

واتختل تراچي بكل زلف ناعور يچفيني ضوه مفرّط
وألم حچيك جرف هيل وسمر عنبر
وعلى جيد الدفو تنزل نده كلاده
بسفر ليل المشه براسي نواطير وسوالف ماحضن بلسان
اتشلبه السمه دخان
غنيت الشمس حالوب..
بوكت طول النخل خدران

بجويريد چلمه نعيش
فَي حچي الدلال رماد
وانت فياي نسمة ريش
ورمش طفله وعرس نعناع
باريني صهيل شراع..
تلگاني صدر ضفّه
شما تزگي الدرب وسفه..
والف وسفه..
چنّه نفيض.. من چان النهر نيشان
عصفورين.. من چان السمه تفك ريجها بغربان

وتعنيت الحلم سهران..
نيتي اتناوشك بالبوك
وگضاني الشوگ




محمد ابو سرآج

البرنس مديح ال قطب معجب بهذا

طرحكم مميز بحق.. وبارك الله فيــــــــــكم أنار الله قلبكم ودربك ورزقكم برد عفوه وحلاوة حبه ورفع قدركم في أعلى عليين حفظكم المولى ورعاكم وسدد بالخير خطاكم ولكم كل الود من القلب وباقات جاسمين يسلموااااااااا القيصرالعاشق البـــــ مديح آل قطب ـــــــرنس